في الذكرى الأربعين لوفاة زوجها... رسالة مؤثرة من مي مطر!

الجمهورية

2017 -

حزيران -

نشرت الفنانة مي مطر عبر حسابها الخاص على موقع التواصل الاجتماعي "فيسبوك" رسالة مؤثرة تستذكرُ خلالها زوجها الراحل لاعب الهومنتمن السابق جورج بدوي، وذلك بعد ما يقارب الـ40 يوماً على وفاته.

وكتبت مطر في رسالتها: "بكرا قداس الأربعين ومش حودعك مستحيل ودعك.. خسارتك حبيبي ما في شي بعوضها.. لا ايام، ولا احلام، ولا سنين، ولا زمن.. اللي بيعرفك بيعرف اديش خسارتي كبيرة، اللي بيعرفك بس بيعرف ليش وجعي كبييير وما بينحمل.. صورتك بقلبي، بعقلي، بدمي، انت كنت ملاك عالارض، والارض مش للملايكة.. من شهرين سألتك رفيقتي اذا بتخاف من الموت وبعدو جوابك براسي "انا ما بخاف من الموت، لأني ما رح حس شي، بس بخاف عمرتي وولادي من بعدي يصرلن شي وما اقدر احميهن" انت حامينا وعم بحس بهالشي كتير يا حبيبي. انت زلمي تعلّم منك رجال كيف يعاملو مرتن وكيف يحبوها ويحترموها..".

وأضافت: "إنت إنسان تعلّمت منك ناس كيف يعملو منيح وما يحكو. كيف ما يزعلو من حدا ولا من شي.. يا نيالي، اديش انا محظوظة! اصعب شي بالموضوع، اني عم بشتقلك اكتر واكتر، اشتقت احكي انا وياك، اشتقت امبسط معك لو مش عم نعمل شي.. اشتقت لهيدي الفرحة اللي كنت حسها من جوّا بس كون معك.. اشتقت اعملك اكل، وكزدر انا وياك بالسيارة لنسمع موسيقى، اشتقت لمسكة ايدك اللي كانت تمسك ايدي عطول وبكل لحظة حتى بس نغفى.. كنت اشتقلك انت وحدي، كيف وانت مش حدي؟! يا الله كيف كنت تجن اذا في شي مزعّلني، تعى شوف اديش زعلاني عحالي يا احن رجال واحن بي.. بوعدك كل شي كان بدك ياه حأعملو، وكل شي كنت تتمناه للولاد حيصير.. عايش معي وفيّي وعايش جوّات جيورجيو وجيوڤاني.. شكراً حبيبي عطيتني فرصة حب وانحب، شكراً انك ما نزلتلّي دمعة الا دمعات الفرح، شكراً خلّيتني انسانة احسن، شكراً علّمتني لكتير، وانو كل الناس منيحة ليبرهنو العكس... مش رح ودعك، مشواري طويل، عم بشتقلك، ومن هون لارجع شوفك، حبيبي بحبك بحبك بحبك".

وختمت قائلة: "قلّها للعذرا اني زعلاني منها كتير ومش عم بقدر صلّي.. واذا في شي عم بخلّيني جرب ارجع صلّيلها، هو انها كانت آخر كلمة قلتها.. "يا عذرا، غمريلي حبيبي وشدّي".

تابعوا آخر أخبار "Radar Scoop" عبر Google News، اضغط هنا