بعد ربع ساعة رجعت وشفت الزجاج مكسور والشنطة انسرقت!

رصد رادار سكوب

2019 -

تشرين الثاني -

نشر المواطن اللبناني زياد الرمّوز عبر حسابه الخاص على موقع فيسبوك، تفاصيل الحادثة التي تعرّض لها ظهر يوم الجمعة حين أوقف سيارته امام سوبرماركت جبيل تاركاً حقيبة صغيرة خلف المقعد الجانبي. وجاء في المنشور:

"٢٢ تشرين الثاني ٢٠١٩ الساعة ١:١٥ الظهر وقّفت سيارتي قدام سوبرماركت جبيل واخدت محفظتي معي وبِقيت شنطة صغيرة حاطتها بأرض السيارة ورا المقعد يلي حدّي.

وبعد ربع ساعة رجعت وشفت انه الإزاز مكسور والشنطة انسرقت. راجعنا كاميرات السوبرماركت تبّين انه بس وقّفت السيارة ١:١٥ وفتت وصلت سيارة سودا نزل منها شب كسر الازاز وسرق وانطلقت السيارة ١:١٩.... القصة كلها رفّة جفن... قالولي يمكن مراقبك ويمكن صدفة...الله يسامحك كيف بتخلّي الشنطة بالسيارة؟ طيب و شو كان فيها؟

كان فيها مفاتيح بيتي، مسبحة،خاتمي شارجور تليفوني وخمسة ملايين ليرة، بكل الاحوال يلي صار صار... ما تشكيت اكيد ما في داعي.. في جرايم اكبر بكتير ومجرمينها ما بينوا...

وفي مجرمين قدامنا وما حدا عمبحاكمهن. السرقة والنشل كتروا والخير لقدام.. انا بدي قلّك انشالله ربنا يسامحك يمكن الجوع والفقر خلّيك تعمل هيك بس كمان بدي قلك انه هالمصاري يلي اخدتن مش ثمن سفرة او سهرة او بدلة، هول حق علبة دوا للسرطان رايح اشتريه وادفع حقه نقدي لأن الصيدلية ما بتقبل تقبضه بالبطاقة المصرفية...

يمكن المصاري بتروح وبتجي ويمكن بدل الخاتم اشتري تنان ويمكن الإزاز اذا انكسر بيتصلح بس كون اكيد انه الخواطر اذا انكسرت ما بتتصلح وانت كسرت بخاطر مريض كان ناطر هالدوا... صحيح يلي على الارض ما شافك بس يلي بالسما شافك وانشالله يسامحك...

يلاّ هينة صحتكن بالدني"

تابعوا آخر أخبار "Radar Scoop" عبر Google News، اضغط هنا