بالفيديو: ما لم يُكشف من كلمة نديم الجميّل في مؤتمر الكتائب

ألقى النائب نديم الجميّل كلمة مدوية خلال المؤتمر ٣١ لحزب "الكتائب"، تناول فيها وضع الحزب مسجّلاً عدداً من الإعتراضات على المسار السياسي والداخلي الذي انتهجته القيادة منذ ما قبل الإنتخابات النيابيّة حتى اليوم.

وأبرز ما جاء في كلمة النائب نديم الجميّل:

هيدا المؤتمر قابل للطعن أمام الهيئات الحزبية، وأمام القضاء إذا لزم الأمر. وبالتالي أنا من اليوم بعلن الطعن بكلّ التوصيات والقرارات والانتخابات والتعيينات يللي بدا تصدر عنّو. مين مسؤول عن الهزائم والنكسات والفشل؟ الملائكة؟ الطليان؟ إنتو اليوم يللي عم تجدّدو لحالكن مسؤولين عن الحالة يللي بلغها الحزب. كيف مندعي الدولة إلى الإصلاح ونحنا ما منصلح بالحزب؟ كيف مندعي الدولة تكون ديمقراطية ونحنا منخنق الديمقراطية بالحزب؟ كيف مندعي للمحاسبة بالحكومة ومنرفض المحاسبة بالحزب؟ هل بتظنّو إنو الأمور راح تسلم معكم على طول؟ معاشات 5 رفاق لإلنا بالبيت المركزي، بتساوي موازنات ثلاث أقاليم أساسية، أو بتساوي موازنات إقليم الشمال والجنوب مجموعين مع بعضهم… وعن أي تقرير مالي جايين تحكونا اليوم…. وأساسًا من وين مصدر المال؟؟؟؟ بجاوبونا من متبرعين… أي متبرعين؟؟؟ لبنانيي؟ أجانب؟ أفراد؟ شركات؟ جمعيات؟ دول؟ شو الغاية من إنو هالناس عم بيتبرعوا؟ ما في جواب… بس… في تقرير مالي غير شفاف… ليش سألت عن الموازنه كمان ؟؟؟؟ لأن بيوت الكتائب مسكّرة وما فيها حياة.

ونحنا من مهرجان لمهرجان… إضاءة وصوت وأجارات وديكور وفذلكات فنّية. المهمّ الاستعراض وعلى الأرض ما في شي... trompe l’oeil. وين الناس وين القواعد وين الأنصار والأصدقاء... وصلت لانه نعمل مهراجانات انتخابية بلا ما نسمح للمرشّحين يطلعوا على المسرح قبل الانتخابات الأخيرة والرفاق متروكين بلا رعايه وبلا خدمات وبلا مساعدات شو صار دور الكتائب اليوم؟؟ مركز رصد الفساد والكوميسيونات؟؟ أم جمعيّة بيئية؟؟؟ هذا شغل رائع بس هيدا شغل المصالح مش شغل حزب عمره 83 سنة… وعندو 10 ألاف شهيد. هيدا مش حزب بيار وبشير الجميّل. مش حزب المؤسّسين والمناضلين والأجيال الكتائبية. هيدا دور جمعيات المجتمع المدني. لا يا رفاق، الكتائب غير هيك... الكتائب المدافعه عن نشوء لبنان، عن الصيغة، عن الميثاق، عن نموذج التعايش المسيحي الإسلامي، عن السيادة والاستقلال عن اللامركزية ما فينا نختصر دوره بمعركة النفايات.

وإذا كنا ككتائبيين منحترم شرعية الحزب، فالغالبية الساحقة من الكتائبيين غير موافقة على سياسة الحزب. شو عم تعمل لنحلّ مشكلة النزوح أو لنضغط على الدولة لتردن على بلدهم؟؟؟؟؟ نحن حزب وحدة المسيحيين نحن مش شغلتنا نعلق مع كلّ القيادات رموز المسيحية. مع مين بدنا نتفق؟؟؟

حزب الـ100 ألف بطاقه بلا ما خبركم قديش صرنا. يلي عم بيصير هو تبديد لإرث عريق... هو أنو ناس بلا خبرة حزبية وسياسية دايرين صرح مقدّس كان يعبّر عن الوجدان المسيحي والقضية اللبنانية، بصفوفنا في مئات الكفاءات العظيمة، لكن ممنوع يتقدّموا. كلّ شيء محصور بـ4 أو خمس أشخاص من دون خبرة سياسية وحزبية. أنا كتائبي ونقطة ع السطر ومش كلّ مرّة منحكي عن إصلاح الحزب وتقدّمو ونهضتو بيصير تخوين وتشكيك. هالعادة بدكن تغيّروها وما خلق يلّلي بدو يشكّك بكتائبية نديم الجميّل.

تابعوا آخر أخبار "Radar Scoop" عبر Google News، اضغط هنا

2019 -

شباط -

محليات

بالفيديو: ما لم يُكشف من كلمة نديم الجميّل في مؤتمر الكتائب

المزيد من الأخبار

قرّاء رادار سكوب يتصفّحون الآن

آخر الأخبار على رادار سكوب