محامية تُفجّر قنبلة من العيار الثقيل.. اليوم حدث في بلدتي الناعمة!

فجّرت ابنة بلدة الناعمة، المحامية إليان مطر، قنبلة من العيار الثقيل بعدما نشرت تفاصيل ما حصل يوم الجمعة العظيمة في المسيرة من كنيسة مار الياس الى كنيسة السيدة.

مطر كتبت: "اليوم يوم الجمعة العظيمة... اعظم يوم بالسنة... اليوم ملك المجد يسوع المسيح مشي درب الجلجلة.
مشي المسيح بعد الحكم عليه بالموت في دروب القدس محفوفاً بالجنود الرومانيين واليهود، واجتاز المسافة الفاصلة بين المحكمة ومكان الصلب وهو يحمل صليبه... ليخلصنا. وهيدي المسافة هي درب الآلام درب الجلجلة.

بكل سنة بيجتمع معنا مؤمنون من كل المناطق المجاورة المحيطة والبعيدة ليشاركوا معنا بالمسيرة من كنيسة مار الياس لكنيسة السيدة، وبكل سنة منزيد ومنكتر..
وبكل سنة أهالي الضيعة بيحاولوا يستذكروا هاليوم على طريقتن وبيحمل شاب الصليب وحواليه من يمثل اليهود وامه مريم العذراء وبيمشو كلن ومثل كل سنة ولو شو ما كانت الظروف كاستعادة تاريخية وروحية وايمانية لرسالة المسيح..."

وأضافت: "بس اللي صار اليوم مش هيك.. ومش مثل كل سنة.. ومش مثل ما بيصير كل مرة..
اليوم الساعة ٢:٤٥ من بعد الظهر وقبل ربع ساعة من موعد المسيرة قرر الكهنة يلغوا المسيرة نظرا" لسوء الأحوال الجوية! ونزل هالخبر كالصاعقة على الوفود والناس!
نعم... الكهنة قرروا إلغاء المسيرة ! هني لي لازم يكونوا عم يمثلوا صورة المسيح بيناتنا.. هني لي لازم يمشوا قدامنا.. هني لي لازم يعلمونا نتحمل درب الجلجلة ونعيشوا بكل الظروف لأن هيدا المفروض يكون دورهم."

وتابعت: "بس المفاجأة كانت انو العالم رفضت وقررت تمشي المسيرة لحالها.. بلا كهنة وبلا كورال وبلا ترانيم... وشمست وما شتت علينا.
نعم مشينا بلاهن لنوصل على كنيسة السيدة نلاقيهم واقفين عالمذبح للقداس.. العالم والوفود الواصلين من المسيرة تفاجأوا وكملت البلبلة وما خلصت والعالم مستاءة من هيك تصرف وقرار.

للصراحة انا شخصيا" كنت مرتاحة أكثر بالمسيرة هالسنة لأن عن جد لي شارك فيها بهالطقس كان المؤمن بالفعل وبفضل كل سنة أهالي الضيعة تنظم وتعمل وتمشي بالمسيرة لحالها .. (وهيدا الرأي لي انا مسؤولة عنو شخصيا" رأي كثير ناس كمان وسمعتوا من كثار اليوم)"

وأردفت: "سكتنا كثير بس نحنا منعرف ننظم ونعمل ونمشي بالمسيرة ومنعرف نعمل عشاء قروي على عيد السيدة ومنعرف نعمل كارميس على عيد مار الياس لأن اشطر قرار انتو في " تلغوا".. بس اليوم ما زبطت تلغوا المسيرة لسببين:

الأول الطقس العاطل ما رح يمنعنا نمشي بيوم الجمعة العظيمة لما شفنا صور المسيرة بعنايا وببقاعكفرا تحت الثلج استحينا..
والثاني انو اليوم كانت المسيرة عن روح نفس المرحوم الشاب رودي مطر لي خسرناه عفجأة ولي انا شخصيا" ما كنت اعرفو .. وانا كانت ناوية امشيا عن راحة نفس جدي لي انتقل لعند ربنا من ١٠ ايام ... "

وختمت: "ما في شي رح يوقفنا لا شتي ولا ثلج كونوا اكيدين.. وبكرا رح نقول المسيح قام."

تابعوا آخر أخبار "Radar Scoop" عبر Google News، اضغط هنا

رصد رادار سكوب

2019 -

نيسان -